قبروں کو عیدیں بنانے سے پیدا ہونے والی خرابیاں (حصہ اوّل)

سلوک اور ایمانیات:
قبروں کو عیدیں بنانے میں ایسی عظیم خرابیاں اور مفاسد ہیں ،جنہیں اللہ کے سوا کوئی نہیں جانتا، ایسی باتیں جو ہر اس شخص کے دل کو غضب میں مبتلا کر دیتی ہیں ، جس کے دل میں اللہ ﷻ کا وقار، توحید پر غیرت، اور شرک سے نفرت ہو۔
یہ سب شرک کو بدصورت اور قبیح ٹھہرانے والی باتیں ہیں، لیکن
“مردہ کو لگنے والے زخم میں درد نہیں ہوتا”۔
قبروں کو عیدیں بنانے کے مفاسد میں سے یہ ہیں:
ان کی طرف نماز پڑھنا، ان کا طواف کرنا، انہیں بوسہ دینا اور چھونا، ان کی مٹی پر رخسار رگڑنا، ان کے مدفون لوگوں کی عبادت کرنا، ان سے مدد مانگنا،
ان سے فتح، رزق اور عافیت طلب کرنا، قرضوں کی ادائیگی، مصیبتوں کے دور ہونے، فریاد رسی، اور دیگر حاجات کا سوال کرنا—یہ سب وہی مطالبات ہیں جو بت پرست اپنے بتوں سے کیا کرتے تھے۔
اگر تم ان غالی لوگوں کو دیکھو جو قبروں کو عید بنا لیتے ہیں، کہ جب وہ دور سے قبر کو دیکھتے ہیں تو سواریوں سے اتر پڑتے ہیں، اپنی پیشانیاں زمین پر رکھ دیتے ہیں، زمین کو چومتے ہیں، سر کھول دیتے ہیں، ان کی آوازیں بلند ہو جاتی ہیں، شور و غوغا کرتے ہیں، رونے کی ایسی اداکاری کرتے ہیں کہ ہچکیوں کی آواز سنائی دیتی ہے، اور یہ سمجھتے ہیں کہ انہوں نے حاجیوں سے زیادہ نفع کما لیا ہے۔
پھر وہ اس ہستی سے فریاد کرتے ہیں جو نہ کسی کو پیدا کرتی ہے نہ دوبارہ زندہ کر سکتی ہے، اور دور ہی سے پکارتے رہتے ہیں۔ یہاں تک کہ جب قبر کے قریب پہنچتے ہیں ، تو اس کے پاس دو رکعت نماز پڑھتے ہیں ، اور سمجھتے ہیں کہ انہوں نے ایسا اجر حاصل کر لیا ہے ، جو قبلۂ اوّل و دوم کی طرف نماز پڑھنے والے کو بھی حاصل نہیں ہوتا۔
تم انہیں قبر کے گرد رکوع و سجود میں دیکھو گے، وہ مردے سے فضل اور رضامندی طلب کر رہے ہوتے ہیں، حالانکہ ان کے ہاتھ ناکامی اور خسارے سے بھر چکے ہوتے ہیں۔ پس وہاں اللہ کے لیے نہیں بلکہ شیطان کے لیے آنسو بہائے جاتے ہیں، آوازیں بلند ہوتی ہیں، مردے سے حاجات مانگی جاتی ہیں، مصیبتوں کے دور ہونے، محتاجوں کو غنی کرنے، اور معذور و مبتلا لوگوں کی شفا کا سوال کیا جاتا ہے۔
پھر وہ قبر کے گرد طواف کرنے لگتے ہیں، اسے بیت اللہ کے مشابہ بنا دیتے ہیں، حالانکہ بیت اللہ کو اللہ ﷻ نے بابرکت اور تمام جہانوں کے لیے ہدایت بنایا ہے۔
پھر وہ بوسہ دینے اور چھونے لگتے ہیں—کیا تم نے حجرِ اسود کو دیکھا ہے اور بیت اللہ کے وفود اس کے ساتھ کیا کرتے ہیں؟
اس کے بعد وہ اسی قبر کے پاس اپنی پیشانیاں اور رخسار مٹی میں رگڑتے ہیں، حالانکہ اللہ جانتا ہے کہ یہی پیشانیاں اس طرح اس کے سامنے سجدے میں بھی نہیں لگتیں۔
پھر وہ قبر کے حج کے مناسک پورے کرتے ہیں، وہیں بال کٹواتے اور منڈواتے ہیں، اور اس بت سے اپنا حصہ حاصل کرنے کی کوشش کرتے ہیں، کیونکہ اللہ کے ہاں ان کا کوئی حصہ نہیں ہوتا۔
وہ اس بت کے لیے قربانیاں پیش کرتے ہیں، اور ان کی نماز، ان کا نسک اور ان کی قربانی سب اللہ ربّ العالمین کے سوا کسی اور کے لیے ہوتی ہے۔
اگر تم انہیں دیکھو کہ ایک دوسرے کو مبارک باد دے رہے ہیں اور کہتے ہیں:
– اللہ ﷻ ہمیں اور تمہیں بہت زیادہ اجر اور بڑا حصہ عطا فرمائے”،
پھر جب وہ لوٹتے ہیں تو پیچھے رہ جانے والے غالی لوگ ان سے کہتے ہیں کہ قبر کے حج کا ثواب ہمارے بیت اللہ کے حج کے بدلے بیچ دو،
تو وہ جواب دیتے ہیں: “نہیں، اگرچہ تم ہر سال حج کرو۔”
حواله : اغاثة اللهفان في مصايد الشيطان، (1/350) طبع عطاءات العلم.