ریاضُ الإیمان – نبی ﷺ کے ساتھ صحابہ کا حال — محبت اور تعظیم کی عظمت

الحمد للہ، اللهم صلِّ على رسول الله ﷺ
امام ابن رجب الحنبلي رحمہ اللہ فرماتے ہیں کہ رسول اللہ ﷺ کی محبت دو درجوں پر مشتمل ہے:
پہلا درجہ (فرض): یہ وہ محبت ہے جو اس بات کا تقاضا کرتی ہے کہ نبی ﷺ جو اللہ کی طرف سے لے کر آئے، اسے محبت، رضا اور تسلیم کے ساتھ قبول کیا جائے۔
ان کے احکام کی اطاعت کی جائے، واجبات پر عمل اور محرمات سے اجتناب کیا جائے، اور اپنی استطاعت کے مطابق دین کی نصرت کی جائے ، یہ درجہ لازمی ہے، اس کے بغیر ایمان مکمل نہیں ہوتا۔
دوسرا درجہ (مستحب): یہ وہ محبت ہے جو نبی ﷺ کی کامل پیروی، آپ کی سنت، اخلاق، آداب، نوافل، عادات (کھانا، پینا، لباس) اور آپ ﷺ کے حسنِ معاشرت کو اپنانے کا تقاضا کرتی ہے۔
صحابہ کرام رضی اللہ عنہم کی محبت اور تعظیم کی جھلکیاں:
-حضرت علي بن أبي طالب رضی اللہ عنہ سے پوچھا گیا: تمہاری رسول اللہ ﷺ سے محبت کیسی تھی؟فرمایا: اللہ کی قسم! وہ ہمیں ہمارے مال، اولاد، والدین بلکہ سخت پیاس میں ٹھنڈے پانی سے بھی زیادہ محبوب تھے۔
-صحابی زيد بن الدثنة رضی اللہ عنہ کو جب کفار نے قید کر کے قتل کے لیے لٹکایا، تو کہا: کیا تم پسند کرو گے کہ محمد ﷺ تمہاری جگہ ہوں اور تم اپنے گھر میں ہو؟ انہوں نے کہا: اللہ کی قسم! مجھے یہ بھی گوارا نہیں کہ رسول اللہ ﷺ کو ایک کانٹا بھی چبھے اور میں اپنے گھر میں آرام سے بیٹھا رہوں۔ اس پر أبو سفيان بن حرب نے کہا: میں نے کبھی کسی کو کسی سے ایسی محبت کرتے نہیں دیکھا جیسے محمد ﷺ کے صحابہ ان سے کرتے ہیں۔
-غزوۂ احد میں جب یہ خبر پھیلی کہ نبی ﷺ شہید ہو گئے، ایک انصاری عورت کے بیٹے، والد، شوہر اور بھائی شہید ہو گئے، لیکن وہ صرف پوچھتی رہی: رسول اللہ ﷺ کا کیا حال ہے؟جب اس نے آپ ﷺ کو دیکھا تو کہا: میرے ماں باپ آپ پر قربان ہوں، آپ کے بعد ہر مصیبت معمولی ہے۔
-اور صحابہ کرام رضوان اللہ علیہم نے رسول اللہ ﷺ کو اپنے نفسوں اور اپنے مالوں میں حاکم مان لیا اور عرض کیا: یہ ہمارے مال آپ کے سامنے ہیں، آپ ان میں جو چاہیں فیصلہ فرمائیں۔ اور یہ ہماری جانیں بھی آپ کے سامنے ہیں، اگر آپ ہمیں سمندر میں کودنے کا حکم دیں تو ہم ضرور کود جائیں گے۔ ہم آپ کے آگے، آپ کے پیچھے، آپ کے دائیں اور آپ کے بائیں ہر طرف سے آپ کے لیے جنگ کریں گے۔”
-صلح حدیبیہ کے موقع پر عروة بن مسعود الثقفي نے جب رسول اللہ ﷺ اور صحابہ کا حال دیکھا تو قریش سے کہا:میں قیصر، کسریٰ اور نجاشی کے درباروں میں گیا ہوں، مگر میں نے کبھی کسی بادشاہ کو اتنی تعظیم پاتے نہیں دیکھا جتنی محمد ﷺ کو ان کے صحابہ دیتے ہیں۔روایت: صحيح البخاري.
-حضرت عمرو بن العاص رضی اللہ عنہ فرماتے ہیں: رسول اللہ ﷺ سے بڑھ کر کوئی مجھے محبوب نہ تھا، اور نہ کوئی میری نظر میں زیادہ عظیم تھا۔ میں آپ کی ہیبت کی وجہ سے بھر کر آپ کو دیکھ بھی نہ سکتا تھا۔روایت: صحيح مسلم.
جب یہ آیت نازل ہوئی: (يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ…) — سورة الحجرات – تو حضرت عمرؓ اتنی آہستہ آواز میں بات کرتے کہ نبی ﷺ کو دوبارہ پوچھنا پڑتا۔ (بخاری)
-ثابت بن قيس بن شماس رضی اللہ عنہ، جو بلند آواز تھے، اس آیت کے بعد گھر میں بیٹھ گئے اور سمجھا کہ وہ ہلاک ہو گئے، یہاں تک کہ نبی ﷺ نے انہیں جنت کی بشارت دی۔ (بخاری) والله أعلم.