د مړي په اړه د (مرحوم) ویلو حکم (د خبر په توګه) – عقیدوي غلطۍ

له فضیلة الشیخ ابن عثیمین رحمه الله تعالى څخه پوښتنه وشوه:
آیا د وفات شوو کسانو لپاره د (مرحوم) ویل صحیح دي؟ لکه دا ویل چې (مرحوم فلانی)؟
نو هغه رحمه الله تعالى ځواب ورکړ: که یو څوك د مړي په اړه د خبر په توګه ووایي: (مرحوم) یا (مغفور له) او داسې نور، نو دا جائز نه دي؛ ځکه انسان ته معلومه نه ده چې آیا هغه ته رښتیا رحمت رسېدلی دی که نه. او د داسې شي په اړه چې علم پرې نه وي، د یقیني ګواهي ورکول صحیح نه دي، ځکه دا د بې علمه کس لپاره د رحمت او مغفرت شاهدي ورکول دي، او بې علمه شاهدي حرامه ده.
خو که دا الفاظ د دعا او امید په نیت وکارول شي، یعنې مطلب یې دا وي چې: (الله سبحانه وتعالی دې پر هغه رحم وکړي) ، نو بیا په دې کې هېڅ حرج نشته. که څوك ووایي (مرحوم) یا (الله دې پرې رحم وکړي) دواړه یو شان دي؛ ځکه دواړه د خبر او دعا دواړو معنی لري، او دا د ویونکي د نیت پورې تړاو لري.
او کوم خلک چې وایي: “فلانی مرحوم دی” یا “مغفور له دی”، د هغوی مطلب دا نه وي چې هغوی د یقیني مغفرت شاهدي ورکوي، بلکې مقصد یې دعا او امید وي. نو د دې الفاظو په کارولو کې هېڅ ستونزه نشته.
ماخذ : مجموع فتاوى ورسائل ابن عثیمین: ( 17/451)