امیر کے لیے نیك اور صالح مشیروں کی اہمیت

سعید بن عبدالعزیز رحمہ اللہ تعالى بیان کرتے ہیں کہ جب سلیمان بن عبدالملك خلیفہ بنے تو انہوں نے عمر بن عبدالعزیز رحمه الله تعالى سے کہا:
( اے ابو حفص ! تم دیکھ رہے ہو کہ ہم اس منصب کے ذمہ دار بنائے گئے ہیں، حالانکہ اس کے انتظام و تدبیر کا ہمیں کوئی تجربہ نہ تھا۔ لہٰذا تم عوام کی بھلائی اور مصلحت کی جو بات مناسب سمجھو، ہمیں اس کا حکم دو)
چنانچہ عمر بن عبدالعزیز کی رائے سے حجاج کے مقرر کردہ عاملوں کو معزول کیا گیا، نمازوں کو اُن کے مقررہ اوقات میں ادا کیا جانے لگا، جبکہ اس سے پہلے انہیں اُن کے وقت سے مؤخر کر دیا جاتا تھا، اور اس کے علاوہ بھی بہت سے اہم امور میں سلیمان، عمر بن عبدالعزیز سے مشورہ لیتے اور اُن کی بات قبول کرتے تھے۔ یہ بھی بیان کیا گیا ہے کہ سلیمان نے حج کیا۔ جب انہوں نے میدانِ عرفات میں لوگوں کا عظیم مجمع دیکھا تو عمر بن عبدالعزیز سے کہا : -کیا تم اس مخلوق کو نہیں دیکھتے، جن کی تعداد اللہ تعالیٰ کے سوا کوئی شمار نہیں کر سکتا ؟
عمر بن عبدالعزیز نے فرمایا : یہ لوگ آج تمہاری رعیت ہیں، لیکن کل قیامت کے دن یہی تمہارے مدِّمقابل اور تم سے اپنے حقوق کا مطالبہ کرنے والے ہوں گے۔”
یہ سن کر سلیمان بن عبدالملک بہت شدت سے رونے لگے۔
امام ذہبی رحمہ اللہ تعالى فرماتے ہیں: عمر بن عبدالعزیز، سلیمان کے لیے سچے اور خیر خواہ وزیر تھے۔ پھر سلیمان دابق میں ایک ہفتہ بیمار رہے اور وہیں وفات پا گئے، جبکہ اُن کے بیٹے داؤد، قسطنطنیہ کی مہم میں شریک ہونے کی وجہ سے وہاں موجود نہ تھے۔ حواله (سیر أعلام النبلاء، 5/125)